október 2025 - Félag um innri endurskoðun

Vefnámskeið – Siðareglur endurskoðanda og nýjar kröfur um samþættingu stjórnarhátta og reikningsskila

Uppfært - Afsláttarkóði við skráningu - Snemmskráning til og með 23. nóvember

Endurmenntun Háskóla Íslands heldur vefnámskeið þann 2. desember 2025 um siðareglur endurskoðanda og nýjar kröfur samþættingu stjórnarhátta og reikningsskila. Námskeiðið er haldið í samstarfi við Félag um innri endurskoðun.

Nú liggur fyrir að innleiða nýja staðla Alþjóðasamtaka innri endurskoðenda þar sem siðareglur eru orðnar samþættar öðrum stöðlum. Sambærilegar breytingar hafa þegar átt sér stað í siðareglum ytri endurskoðenda. Á sama tíma hafa komið fram nýjar kröfur og alþjóðleg viðmið samþættingu stjórnarhátta og reikningsskila hjá stærri skipulagsheildum.

Nýju viðmiðin hafa áhrif á endurskoðendur skráðra félaga, fjármálafyrirtækja, lífeyrissjóða, sveitarfélaga og ríkisaðila. Mikilvægt er að ábyrgðaraðilar stjórnarhátta rækji skyldur sínar um gagnsæi, áhættustýringu og innra eftirlit. Innri endurskoðendum og ytri endurskoðendum ber svo að leggja sjálfstætt mat og veita upplýsingar sem styðja við að þessar skyldur séu uppfylltar.

Á námskeiðinu verður fjallað um ný ákvæði GIAS 2024, Integrated Thinking Principles IFRS Foundation (2024) og tilskipun ESB um sjálfbærnireikningsskil (CSRD), með áherslu á ábyrgð innri og ytri endurskoðanda, gagnsæi og sannreynanlegar stjórnendaupplýsingar í árlegum reikningsskilum.

Námskeiðið er sjálfstætt framhald námskeiðs um siðareglur sem haldið var á síðasta ári og er skipulagt í samstarfi við Félag um innri endurskoðun.

Nánar um kennara

Ásgeir Brynjar Torfason er Doktor í fjármálum, ritstjóri Vísbendingar og kennari í viðskiptasiðfræði.
Sigurjón G. Geirsson er löggiltur endurskoðandi og innri endurskoðandi Háskóla Íslands.

Þri. 2. des kl. 9:00-11:00

Fer fram í rauntíma á Zoom

Verð: 19.900 kr

Snemmskráning til og með 23. nóvember, 19.900 kr. Almennt verð er 21.900 kr.

Félagsfólki Félags um innri endurskoðun býðst 20% afsláttur af öllum námskeiðum* á dagskrá veturinn 2025 - 2026 hjá Endurmenntun Háskóla Íslands.

Skráning fer fram á heimasíðu Endurmenntunar og til að virkja afsláttinn þarf að nota afsláttarkóðann INNRIEND2526 þegar pöntun er gerð.

Námskeið þetta gefur 2 endurmenntunareiningar á sviði siðareglna.

Skráning fer fram hjá Endurmenntun Háskóla Íslands: Siðareglur endurskoðanda

Af morgunverðarfundi FIE 8. október

Frábær mæting var á morgunverðarfund FIE sem haldinn var í höfuðstöðvum Arion banka hf. þann 8. október.
Þema fundarins var sviksemisáhætta og varnir gegn henni. Óhætt er að segja að erindin hafi í senn verið áhugaverð og fræðandi.

Lædrómur fortíðarinnar til að verja okkur til framtíðar - Hákon Lennart Aakerlund, Öryggisstjóri hjá Arion, fjallaði um hvernig sífellt verður erfiðara fyrir einstaklinga og fyrirtækia að verjast árásum með aðkomu gervigreindar. Eins og of áður er það hin mannlegi breyskleiki sem virðist vera veikasti hlekkurinn við að verjast áhættunni. Þannig verður sífellt erfiðara að greina hvort um t.d. raunverulega sms tilkynningu eða símtal sé að ræða (SMS/call spoofing), hver stendur fyrir þeim, eðli þeirra eða hvaðan þær koma. Hann tók sem dæmi Phishing hilluvöruna Darcula, alþjóðlega Phishing þjónustu - Phishing-as-a-Service (PhaaS) sem nýtir sér gervigreindina.

Einbeittur brotavilji virðist vera allt það sem þarf til að klekkja á grandlausum fyrirtækjum og neytendum þeirra. Hákon birti einnig samanburð af varnarviðbragði Finna við þessum árásum, þ.e. tíðni spoofing árásanna fyrir og eftir að Finna hófu varnir sínar. Eftirstæð áhætta að fengnum mótvægisaðgerðum var sláandi lægri tíðni árása á fyrirtæki og neytendur, sem kom þannig í veg fyrir ómælanlegt tjón. Afar áhugaverð yfirferð.

Sönn íslensk sakamál - Ósvald Jarl Traustason, sérfræðingur í markaðsdeild, kynnti í kjölfarið markaðsherferð Arion um hvernig verjast mætti þeim árásum sem Hákon hafði áður fjallað um. Þar sem veikasti hlekkurinn í frumstæðu áhættunni er einstaklingurinn, þá er fræðsla sterkasta mótvægisaðgerðin. Arion hóf því markaðsherferð með það að markmiði að fræða viðskiptavini sína. Til að vekja sem mesta athygli er henni pakkað í umbúðirnar "Sérstæð sakamál" enda eru þessar árásir saknæmt athæfi. Þá kom Arion á Arion Escape leiknum í sama tilgangi. Frábært framtak Arion sem hefur sannarlega vakið athygli og aukið áhættuvitund einstaklinga og fyrirtækja.

Þróun samvinnu og samstarfs 2. og 3. línu hjá Arion banka - Anna Sif Jónsdóttir, forstöðumaður innri endurskoðunar, tók svo yfirferð á því hvernig samvinna og samstarf 2. og 3. línu hefur þróast á sl. árum. Hún gerði annars vegar grein fyrir þeim kröfum sem IPPF staðlarnir gera um slíka samvinnu og samstarf 2. og 3. línu, sbr. staðal 9.5 um Coordination og Resiliance. Hins vegar hvernig þessar línur hjá Arion hafa stillt sig saman, m.a. með sama áhættuskala og skýrsluformi og sameiginlegu og aðgangsstýrðu skýrslubókasafni eftirlitseininga.

Samnefnari allra erinda af þessum morgunverðarfundi er að leita mótvægisaðgerða við áhættunni, vinna saman og koma hreint fram.

Stjórn FIE þakkar fyrir skemmtilegan morgun, fyrirlesurum fyrir áhugaverð erindi og Önnu Sif sérstaklega fyrir að opna dyrnar enn og aftur fyrir félagsfólki okkar.

Sjáumst næst í húsakynnum Seðlabanka Íslands þann 20. nóvember!!
Kveðja, stjórn FIE

Gestur Páll Reynisson hlýtur CIA fagvottun

Gestur Páll Reynisson hlaut CIA vottun hjá Alþjóðasamtökum innri endurskoðenda í júní s.l. eftir að hafa lokið prófum í maí. Gestur Páll er með B.A. gráðu í stjórnmálafræði frá Háskóla Íslands og meistaragráðu í stjórnsýslufræði frá sama skóla. Gestur Páll hefur starfað sem sérfræðingur á stjórnsýslu- og lögfræðisviði Ríkisendurskoðunar frá árinu 2016. Áður starfaði Gestur m.a. hjá Stofnun stjórnsýslufræða og stjórnmála, rannsóknarnefnd Alþingis um Íbúðalánasjóð og var einn höfunda úttektarskýrslu um Orkuveitu Reykjavíkur (2012). Þá hefur Gestur Páll sinnt stundakennslu frá árinu 2011 við stjórnmálafræði- og viðskiptafræðideild Háskóla Íslands.

Við óskum Gesti hjartanlega til hamingju með fagvottunina!!